Annexe 1
Feu Oudot Gallot alias Courtot, vigneron Dijon, Faubourg Saint-Nicolas, rue des Soilliers 1474, 4 octobre
A. A.D. Côte-d’Or B II 356/6, C 12 – 24, n° 4.
C’est la declaracion et tauxe de tous les biens meubles demeurez du decez de feu Oudot Gallot alias Courtot a son vivant vigneron qui ont este trouvez en son hostel en la rue es Soilliers es feurbourgz de Saint Nicolas de Dijon le IIIIe jour du mois d’octobre l’an mil IIIIc LXIIII par moy Jaques Borestel clerc procureur substitut et par l’ordonnance de honorable homme et saige Jehan Rabustel procureur de la ville et commune dudit Dijon, tous lesquelz biens ont este tauxez par gens a ce cognoissans et par serement donne, etc., en la maniere qui cy apresa est contenu. Et en tous lesquelz biens Girarde vesve dudit deffunct a la moittie. Et l’aultre moittie appartient es enfans dudit feu Oudot Courtot et n’en a este fait aulcun partaige, presens a ce fere Pierre du Chat tuteur et Pierre Bouchier curateur de Anthoynote et Pierre enfans maindres d’aige de feu Perrenot Courtot jaidiz filz dudit feu Oudot, presens aussi Jehan Courtot filz dudit deffunct et oncle desd. maindres, Guiot Parisart et pluseurs aultresa
Et premierement, en la cuisine et chas dud. hostel
Deux petiz plas, XI escuelles, deux pintes, 1 pintat, une saulserote, tout d’estain, pesans ensemble ung chaulveaul de morte matiere XIX livres, la livre tauxee cinq blans ; vallent XXIII gros III blans ;
Item trois potz de cuyvre viez et reboitez que grans que petizb garniz de leurs ances de fer pesans ensamble XV livres, la livre tauxee III blans ; vaillent : XI gros 1 blanc ;
Item ung petit viez chaulderon, une chaulderote blainche d’arain garniz de leurs ances de fer, pesans ensamble XV livres, la livre tauxee III blans ; vaillent : XI gros 1 blanc ;
Item ung petit viez chaulderon, une chaulderote blanche d’arain garniz de leurs ances de fer, une petite vielle paelle, ung bassin a boire eaue a quehue de fer, une droisseure a quehue de fer pesans ensamble XIII livresc, tauxe tout ensemble : 1 fr. ;
Item une vielle paelle grasse d’arain a quehue de fer, une vielle grant quassote a enfant et une escrameure a quehue de ferd, une petite vielle lampe garnie de son coppot de cuivre, tauxe tout ensemble : IIII gros ;
Item une greille, deux petiz cromasles, unes anceotes, 1 grapin, tout de fer, tauxe ensemble : dix blans ;
Item ung vielz soillot, 1 mortier de pierre molure, une vielle lanterne, tauxez ensemble : II gros.
En une petite chambre basse empres
Ung petit lit de plumes garny de son coussin, de deux petis vielz linceulx chascun de deux toilles, d’unne coutrepointe, tauxe ensemble son chaslit : II fr. ;b [fol. 1v]
Item quatre vielz linceulx dessirez chascun de deux toilles et ung demi linceul tauxez ensemble : VIII gros ;
Item cinq couvrechiefz, les IIII tous rompuz et dessirez, tauxez ensemble : VI blans ;
Item cinq vielles nappes contenans ensemble XIII aulnes, toutes rompues, tant ouvrees que de toille plaine, tauxees ensemble : IIII gros ;
Item quatre vielles tergeures dessirees tauxees ensemble deux besasses et une chemise a usaige d’omme : IIII gros ;
Item quatre vielles arches que grandes que petites, les trois de chaisne, l’aultre de foul, tauxees ensemble : 1 fr. ;
Item 1 farinier et six quarterainches de farine de froment tauxez ensemble : VIII gros ;
Item une petite may a prestir, deux formes a quatre piedz de bois, une petite meschant archote sans ferrure, quatre sellese chascune a trois piedz de bois, tauxees tout ensemble : II gros.
Ou solier dessus lad. chambre
Ung petit vielz lit de plumes garny de son coussin de mesmes, d’unne vielle couverte de boige gris royee au bout, tauxe tout ensemble : deux fr. ;
Item deux arches de chaisne, l’unne grande et l’aultre petite ferrees et garnies de sarrures, tauxees ensemble : XVI gros ;
Itemf quinze quartherainches froment et trois quartherainches seigle, tauxe tout ensemble : XVI gros ;
Item ung vielz tourt a filler lainne, une eschielle, une petite table de bois de foul garnie de deux tresteaulx, ung vielz muy vuidange, deux moles de bois a ardoir, deux benastons, une chasiere a tenir fromaiges, tauxe tout ensemble : 1 fr. ;
Item pour deux boisseaulx et demi de chenevey : dix blans ;
Item pour chenoves tant cru que ferrete : trois gros ;
Item une nappe de toille plainne contenant trois aulnes, ung flurey neuf et deux vielz, tauxe tout ensemble : III gros.
En l’esmay sur le jardin derriere
Deux vielles belonges, l’unne grande, l’aultre petite, quatreg vielles quehues et troish muys vuidangesi tauxez ensemblej : XVII gros ;
Item une douzainne de vielz benastons : II gros ;
Item pour deux XIInes d’ozieres fendues et pour chenoves non tilie et pour loyeure tauxez ensemble : six gros ;
Item pour environ IIIc de javelles de sarment et pour aultre bois a ardoir estant en la court tauxez ensemble une grande eschielle : six gros ;
Item deuxk petites vielles cupves a mettre vendange, ung petit rondeaul et ung tenot tauxez tout ensemble : trois fr. ;c [fol. 2]
Item cinq fosseurs, une coignie, ung pic et une tranche tauxez tout ensemble : VIII gros ;
Item ung vent, une corde puiseure garnye de son chainneton, une petite corde a avaler vin vielle tauxez ensemble six vielles faulcilles : XIIII blans ;
Item trois vielles pieces de bois esquarrey et ung polain a avaler vin tauxez ensemble : six gros ;
Item une vielle arche de chaisne sans ferrure tauxee ensemble deux douzainnes de cercles de muyz et de demi muyz tauxez ensemble une traere : six gros.
Ou cellier dessoubz
Troisl muyz et sixl demy muyz de vin du creu de Porvieres et de Lochieres qui font trois queheues, la quehue tauxee l’ung portant l’aultre trois fr. demi ; vaillent : dix fr. demi ;
Item trois tynes a porte vin, ung grant antonneur de bois et ung petit de fer blanc, quatre escuelles rageoires, quatre viez tenotz a fere buyee tant grans que petiz, les mars dud. celier, une quehue et trois muys a despense tauxez tout ensemble : XIIII gros.
<Somme> XIII fr. VII gros demi
Unes letres receues par Thierry Jehannin le VIIe jour du mois de fevrier mil IIIIc et cinquante seellees des seaulx de la chancellerie de monseigneur le duc de Bourgoingne, par lesquelles appert que Jaquote vesve de feu Gaulthier Bernard jaidiz potier d’estan baille a cense annuelle et perpetuelle en imphiteote a Oudot Garnot vigneron pour luy et ses hoirs une piece de vigne contenant environ cinq quartiers assize ou finaige de Dijon ou lieu dit en Porvieres empres les vignes du Saint Esperit d’unne part et courtour de pluseurs vignes d’aultre part pour le pris de dix solz tournois de cense. Cottee au doz par A ;
Unes aultres letres seellees desd. seaulx receues par Pierre Jabry le XIXe jour de mars mil IIIIc quarante six par lesquelles appert que Huguenin Girard clerc baille comme dessus aud. Oudot Garnot alias Courtot et a Jehan Courtot son filz pour eulx et leurs hoirs une maison, mex, aisances, etc., assiz es feurbourgz de Saint Nicolas en la rue es Soilles empres la maison que tient dud. Huguenin Clement Lodilet d’unne part et les fossez de la ville dud. Diion d’aultre part, pour le pris de vint gros. Cottee au doz par Bd ;
Unes aultres letres de Alixandre de Pontaillier abbe de Saint Estienne de Diion de la date du jour des Ingnoscens mil IIIIc XXXIIII, par lesquelles appert que led. abbe baille a cense annuel et perpetuel en imphiteote a Oudot Garnot de Loicheroy une piece de vigne estant de sa [fol. 2v] selle, contenant environ trois quartiers assize ou finaige de Dijon ou lieu dit en la Ribotee de coste Jehannote fille de feu Clement d’Auteville d’unne part, pour le pris de huit gros. Cottee au doz par C ;
Unes aultres letres seellees des seaulx de lad. chancellerie receues par Valenchot Bataillon le XXIIe jour du mois de janvier l’an mil IIIIc XLIX, par lesquelles appert que Michelot Vinere vigneron demorant a Dijon vend perpetuelment aud. Oudot Courtot et a Jehan son filz pour eulx et leurs hoirs une piece de vigne contenant environ ung journaul assize oud. finaige ou lieu dit en Porveres empres les religieux du Saint Esperit de Dijon d’unne part et contour de pluseurs vignes d’aultre part, pour le pris de XIIII fr. Cottee au doz par De ;
Unes aultres letres seellees des seaulxm de doyen et chappitre de la chappelle de monseigneur le duc de Bourgoingne a Dijon de la datte du lundi XVe jour de janvier mil IIIIc XLVII signee par J. Fevre, par laquelle appert que lesd. doyen et chappitre baillent a cense annuelle et perpetuelle en imphiteote aud. Oudot Garnot alias Courtout pour luy et les siens une piece de vigne contenant environ demi journaul assize oud. finaige ou lieu dit darrieres Tulley empres la vigne d’ung nomme le maistre d’ostel vigneron d’unne part parmi paiant chascun an a la feste de Toussains XIIII blans. Cottee au doz par E ;
Unes aultres letres receues soubz les seelz des cours de lad. chancellerie et de l’officialite de Langres le XXVIIIe jour du mois de juing l’an mil IIIIc LX par Jehan Michelot par lesquelles appert que Jehan Vachote alias Garnot demorant a Selongey confesse devoir aud. feu Oudot Courtot et a Jehan Courtot son filz la somme de trois frans et demi pour cause de prest a luy fait, oblige par expres certains heritaiges, promet paier a la Toussains lors suiguant. Cotte au doz par Ff.
Tous lesquelz biens cy dessusn declairez ont este laissie en garde aud. Jehan Cortot alias Garnot, lequel les confesse avoir eu et receu. Et iceulx il promet remettre en main de justice et en rendre bon et loyal compte toutes et quantesfois que requiz en serao du consentement des dessus diz tuteur et curateur. Et de ce il a oblige tous ses biens a la court de, etc. ; presens les dessus dizg.
a. Rayé : declairee.- b. Rayé : pesans.- c. Rayé : la livre.- d. Rayé : tauxees ensemble trois gros.- e. Rayé : a.- f. Rayé : pour.- g. Dessous, rayé : trois.- h. Rayé : ung.- i. Rayé : une aultre vielle quehue aussi vuidange.- j. Rayé : neuf gros demi.- k. Rayé : cupves.- l. Dessous, rayé : quatre.- m. Rayé : d’abbe et couvent de Saint Estienne de.- n. Rayé : inventoriez et.- o. Rayé : Et de ce.